Թղթեր

Որդի Պարմենիդայ, համբակ գոլով եւ մինչդեռ տակաւին յանտիական խակութեանն ոչ յարբունս հասեալ, չքնաղագեղն այն յածեալ յասպարիսին Պեղղեայ Թեսաղացւոց, արծիւ սրաթեւ սլացեալ մագլօք իւր կարկառեալ զնա կամելով տանել յաշխարհն Արգիացւոց եւ ծովու պատահեալ անցից, ձկնորսաց բախեցուցեալ զնաւս վարչօքն. յորմէ բախմանէ ընդոստուցեալ խրտանայր արծիւն: Եւ զերծեալ մանկանն Պարմինիդեայ ստորանկեալ ի ծովն ընկղմէր եւ մակտառական պարփակեալ նաւորդացն մինչեւ պղպջակս արձակեալ ծովուն վերաբերիւր մանուկն: Իսկ նոցա զչքնաղագեղն այն եւ զհրաշատեսիլն ընկալեալ, մատուցանէին զնա տոռականին Արտեմիդեայ եւ ողոքեալ խնդրէին մնալ մանկանն կենդանի, զի մի' ըստ սովորութեան օտարասպանին այն խողխողեսցի: Եւ մարդասիրեալ բագնապետին, հրամայէր ապրեցուցանել ոչ միայն, այլ եւ շնորհս տալ նմա քահանայութեան: Եւ վարժեալ նորա ամենայն իմաստութեամբ, իսկ երաժշտականութեամբ առաւել ծայրագոյն: Զորմէ ասի պատուասիրել յԱրգիացւոցն եւ յամենայն տոռական լեռնայնոցն: Զորոյ եւ զպատկերն անդրի արարեալ ի պղնձոյ եւ օծեալ ոսկւով փող ի բերանն ունի եւ ծիրանի բեհեզ փողեալ ի ծայրս փողին: Զայսոսիկ նկարագրութեամբ զնա դրօշմել պարտ վարկան, որպէս երբեմն անուանեալ զայնոսիկ, որ նախուստ գրեցաք Պոռփիւռոփոնիս զսա սալպինփօնիս այսինքն քնարերգ:

Բայց այժմ տեսանեմք ոչ արծուոյ պատահեալ բախտի քեզ եւ ոչ տոռականին Արտեմիդեայ քոյն վանուց, որ զայսպիսի համբակ ստորանկեալ ընդունէր ձիր: Այսոքիկ բանք առակականք իմաստասիրեալ ի մէնջ հռետորական յաղագս երաժշտիդ Դանիէլի ի Գրիգորէ գրեալ առ Անանիա: