Թղթեր

Կաթսայ յեռանդեան տեսանէր երբեմն մեծն Երեմիաս, եւ զայն յերեսաց հիւսիսոյ, եւ որ այսմ հետեւին:

Զայնոսիկ լռեցից զսանսն Թէսպռոտեան, ի վերայ կալով եռոտանւոյն Կիւռռացի, եւ զսանսն Տիտանեան, յորում զյօշեալ զանդամսն Դիոնէսիոսի եդին:

Գիտեմ եւ զսանն, որ պատրանօք զՊելոսոսն կորուսանէր, յորմէ խոյն խրտուցեալ արտաքս վազէր:

Ոչ թողից չասել եւ զսանն, ի վերայ գլխոյն կալով Ափրոդիտեայ անդրւոյն, զոր այժմ ի ստադին պերճն այն մակտառական գագաթանն ունի, յորում Եբրայեցիքն մտանեն յաւուր հանդիսին:

Բայց եթէ պարտ է, ոչ զանց արարից զՄեստրեմեանն սանէ, զորմէ ասեն երիցս հազարաց ցռից եւ եղջերուաց անյօշել կենդանւոյն ի վերայ եդեալ Հեփեստեայ, ի ճայթոյն վանգիցն ուռուցման պատառելոյ պայթման մորթոյն նշանակեալ, առժամայն լափլէզ մաքրէր զսանն եւ քաղցեալ մնալով, աճապարէր որսոց ինչ հայել. զոր ի միում աւուր վազեալ զկնի իշոց վայրենեաց, գթեալ անկանէր եւ յերեք հարիւր գրկից ունչս հսկային զվէմ առեալ հարթ դիմացն լինէր. եւ վէմն աղացեալ մանրէր յռնգաց առնն. զոր բարկացեալ վիմին, զմնացեալսն ձեռամբ աղացեալ լեսոյր եւ հողմով քամեալ տափարակէր զտեղին, կասկածելով թէ այլ երբեմն այսր գթեալ վնասեսցի:

Բայց ե'կ դու առ աստուածային սանսն օրինաց, յորմէ զպատառսն Ղեւտականք արտաքս բերեալ: Այլ սակս գրոց թարգմանութեանն հատուցաք, զի գիտասցես, եթէ Մովսէսի եւ Յիսուսի եմք աշակերտք եւ նոր Իսրայէլ կոչեցաք ի Քրիստոս. ողջ լե'ր: