Թղթեր

Զտառ քո դամբանական եւ եղկական ուժգնակի վերծանեալ, ըստ իւրում առոգանութեանցն առաւել քան որ նախ քան զայսոսիկ կականումն եւ արտաշնչութիւնք հեծկալով ի խորոցն խանդակաթ յոյժ եւ ըղձացելոյն իմ շարժեաց: Զի վերստին արծարծելով զնորայն աղէտ ողբերգականս շարամանութեամբ յարամանել նորագոյն բանս ըստ քում ներբողական գովասանութեան նախ զմանկական տիս եւ զծաղիկ երիտասարդական հասակիդ եւ զտրամայականութիւն առոգանութեան մարմնոցն եւ զտարբերութիւն եռամասնեայ եւ յուզեալ եռանդոտն արեան, զի այսոքիկ յոյժ դժոխադատ ըստ մարմնոյ մարտուցեալ բնութեանն եւ ըստ հոգւոյ մրցեալ անպատարուն եւ ոչ յանգ հասեալ ալեացն կամ թէ ծերութիւն. եւ այսոքիկ յոյժ ինձ տարակուսելի է, յորժամ զմտաւ ածեմ զդիւրածախ կենցաղոյս, որ իբր արշաւանօք իսկ եւ ասպատակօք գերէ ի մէնջ զանհնարին դարձուցանելով հարկ, կամ թէ իբրեւ կայծակմամբ թափանցիկ սուզեալ, զոչ եղելութիւն միայն տեսանել որպէս նախասականն այն` ծաղիկ թօթափեալ զսա կոչեն կեանս:

Իսկ ի վերայ ողբս եւ քուրձս եւ արտաւսր եւ նսեմութիւն եւ լռելութիւն եւ տրտմութիւն, եւ որ ինչ միանգամ այսմ հետեւին, ո՞ ոք ոչ առցէ: Քանզի զյիշատակ նորա առաջի աչաց իմոց ունելով, ոչ մոռացայց. եւ իբրու ըստ մարմնոյ երբեմն հակամիտելով գտի զնա. եւ մակաբարձեալ ըստ անձին իմոյ վերստին արծարծեալ ի գերբնականութեանն հաստատեցի յոքնաբեղուն հանդիսի եւ աշխատութեամբ, որ եւ սնուցեալ իսկ եմ, այնպիսում զնա վիճակեցի բախտի եւ ակն ունէի ինձ նախ զպարտսն հատուցանել հարցն եւ առ ի նմանէն ծածկիլ: Որում ոչ հանդիպեցայ այժմ, այլ թշուառութիւնք եւ հոգք եւ տարակուսանս ի նմանէն ինձ պտղաբերեցաւ. զի ի կեանս իմ ոչ մխիթարութիւն ինձ տիրապէս հասանել հաւանիմք, մանաւանդ զողորմելի եւ զթշուառացեալ ծերացեալ եւ ծասքեալ մայր նորա, եւ զպատանեացն խակութիւն եւ զբոյս, եւ զեղբարցն միայնութիւն եւ տառապանս, եւ զքեռցն քակտումն ի քաղցր եւ ի հեզահայեաց աչաց:

Բայց դու մանո'ւկ որպէս ի կենցաղումս դուզնաքեայ հլու եւ հպատակ նորայն էիր տէրութեան եւ այսպիսի մեզ ոչ ոք ի նոցունց խոկացեալ գրել. եւ սակս այնորիկ պատասխանեօք զքեզ եւ իմով իսկ առասանութեամբ արծարծեմք. եւ պարտ վարկանիմք, զի ըստ գրեցելումդ մեր զկնի քրիստոսազգեաց եւ շնորհազարդեալ վարդապետիդ եկեսցես Պօղոսի. ողջ լե'ր: