Յիշատակարան. Մասն I (1763-1767)

Եւ զի` յաղագս պարսպաշինութեան սրբոյ Աթոռոյս եւ այլոց հարկաւորաց` դրամ բազում պիտոյանայր եւ ոմանք դրամք յարդեանց նուիրակացն սրբոյ Աթոռոյս ՚ի Կարին եկեալ ժամանեալ էին: Յաղագս որոյ` յղեաց սրբազան Վեհըն զԿաղզուանցի Զաքարիա վարդապետն ՚ի Կարին (որ երբեմն էր նուիրակ Եւդոկիոյ) վասն դրամոց եւ փօլիցայից: Եւ զի` փօլիցայ Զմիւռնոյ նուիրակ Ղուկաս վարդապետին, որ յիշեցեալ է ՚ի Մայիսի Դ, հասեալ էր լրապէս ՚ի Պօլիս, Բ-քն ՚ի Զ-էն Մելքոնենց Տիրացու Խաչատուրին եւ չորքն մհ. Մօվսիսին: Եւ որ Խաչատուրին էր հասեալ, տալոց էր մեզ Մելքոն Աղայն ՚ի Կարին: Վասնորոյ գրեաց սրբազան Վեհըն զղապզ այն դրամոյն աղագաւ եւ ետ Զաքարիա վարդապետին, զի անդ առեալ ՚ի նմանէ զդրամն տացէ նմա: Իսկ չորքն որք առ մհ. Մօվսէսն էին հասեալք, ասաց Զաքարիա վարդապետին առնուլ անդ ՚ի Կարին զերիսն ՚ի նոցանէ ՚ի Մելքոն Աղայէն, զի եւ Խաչատուրն ՚ի Պօլիս ՚ի մհ. Մօվսիսէն առնուցու: Վասն որոյ գրեաց զփօլիցայագիր մի եւ զբարաթագիր մի ՚ի վերայ մհ. Մօվսէսին եւ ետ Զաքարիա վարդապետին, զի առեալ ՚ի Մելքոնէն զդրամն, տացէ նմա: Իսկ վասն միոյն մնացելոյ ՚ի Զ-էն գրեաց սրբազան Վեհըն զփօլիցայագիր եւ զմէկ բարաթագիր ՚ի վերայ մհ. Մօվսէսին, զի առցէ Զաքարիա վարդապետն ՚ի Կարին ՚ի Պ. Ագուլեցի Սարխօշէն զդրամն եւ զթուղթսն տացէ նմա, զի եւ նա յղեսցէ ՚ի Պօլիս առ եղբայրն իւր Աստուածատուրն, զի նա անդ ՚ի մհ. Մօվսիսէն առցէ: Իսկ եւ փօլիս Ուռումէլու նուիրակ Գէորգ վարդապետին (որ ՚ի վերոյ ՚ի յՕգոստ. Զ յիշեցաւ) էր, զի 3 բաժին եւ մինն յայնցանէ կայր առ Սարխօշն ՚ի Կարին, գրեաց առ Սարխօշն զթուղթ, տալ զայն Զաքարիա վարդապետին եւ զսանատն նորին ետ Զաքարիա վարդապետին, զի յառնուլն զդրամն տացէ նմա ընդ թղթոյն: Ուստի` եւ գրեաց սրբազան Վեհըն զթուղթ առ Զմիւռնոյ նուիրակ Ղուկաս վարդապետն ՚ի պատասխանի թղթոյն, ծանուցանելով զորպիսութիւն փօլիցային իւրոյ, որպէս ՚ի վերոյ ասացաւ, որ եւ միամտութիւն նմին: Եւ վասն տպագրական գրոցն դարձեալ հարկ (որպէս եւ ՚ի Մայիսի Դ եւ յառաջ քան զայն գրեցաւ): Եւ զի խորդ որդիք քեալարեցի իրիցփոխ Յարութիւնին մհ. Նիկողայոսն եւ Գէորգն, ունէին ՚ի Զմիւռին առ մի ոմն յաւանդ զդրամ, վասնորոյ` աղաչեցին զսրբազան Վեհըն, որ պատուիրեաց Ղուկաս վարդապետին ՚ի գնալն առնուլ զայն: Եւ նա առեալ էր եւ գրեալ սրբազան Վեհին: Վասն որոյ եւ սրբազան Վեհըն ետ նոցա աստ զդրամն եւ զղապզ առեալ յղեաց առ Ղուկաս վարդապետն: Եւ վասն Սաղաթիէլին եւ զորպիսութեանց երկրիս:

Թուղթ եւս առ մհ. Մօվսէսն ՚ի Պօլիս, դարձեալ վասն բանից վերոյիշեալ փօլիցայիցս եւ որպիսութեանց երկրիս մերոյ:

Թուղթ եւս առ Ուռումէլու նուիրակ Գէորգ վարդապետն, վասն վերոյիշեալ փօլիցային իւրոյ` թէ մեզ էհաս: Եւ վասն այն դրամոյն, զոր յեղբօրէ նորին առնլոց էր (որ ՚ի վերոյ ՚ի Օգոստ. Զ. յղեցաւ) ծանուցանելով` թէ քեզ զղապզ յղեցի: Եւ վասն պիլօր ջահին դարձեալ պատուէր (որպէս եւ ՚ի Յունվարի Ա եւ յայլս տեղիս) եւ զորպիսութեանց երկրիս: Այս թուղթս ընդ թղթոյ Ղուկաս վարդապետին յղեցաւ առ մհ. Մօվսէսն: Իսկ եւ ՚ի վերայ Պօլսոյ նուիրակ Յարութիւն վարդապետին արար սրբազան Վեհըն զփօլիս ՚ի ձեռն Մուրտիկեանց մհ. Փիլիպպոսին որ ՚ի Կարին եւ զփօլիցայագիր եւ զմէկ բարաթագիր գրեալ ետ Զաքարիա վարդապետին, զի թէ հաճեսցի ընդ այս մհ. Փիլիպպոսն, առցէ ՚ի նմանէ ՚ի Կարին զդրամն եւ զփօլիցայագիրսն տացէ ինքեան:

Թուղթ մի եւս առ մհ. Փիլիպպոսն գրեաց ՚ի պատասխանի թղթոյն եւ վասն փօլիցային եւ երկրիս որպիսութեանց եւ միամտութիւն վասն գրեանցն Իսահակայ զորս տուեալ էր այլոց, բաց յայնցանէ, զորս եբեր Տէր Պետրոսն ՚ի սուրբ Աթոռս (զորմէ ասացեալ է ՚ի Մայիսի ԻԲ): Եւ դարձեալ` միամտութիւն վասն մասին ինչ մնացելոյ ՚ի փօլիցայի Պօլսոյ նուիրակ Յարութիւն վարդապետին որ յառաջ քան զայս` առ ինքն, զոր տուեալ էր այժմ սրբոյ Աթոռոյս վէքիլ Տէր Պետրոսին, զի հասուսցէ սրբոյ Աթոռոյս (զորմէ ասացեալ է ՚ի Յունիսի ԻԲ եւ Նոյեմ. ԻԳ):

Թուղթ եւս առ սրբոյ Աթոռոյս վէքիլ Տէր Պետրոսն վասն վերոասացեալ դրամոյս, զոր առեալ էր ՚ի մհ. Փիլիպպոսէն, զոր եւ կամեցեալ էր յղել ՚ի սուրբ Աթոռս ՚ի ձեռն Վանցի Եղիազարի ումեմն, պատուէր` զի թէ չիցէ յղեալ, տացէ Զաքարիա վարդապետին: Եւ վասն Յամթայ նուիրակ Պետրոս վարդապետի փօլիցայի սանատին, որ էր առ ինքն (որպէս ասացաւ ՚ի վերոյ ՚ի յՕգոս. Թ). պատուէր` տալ Զաքարիա վարդապետին, զի նա առցէ ՚ի Մելքոն Աղայէն զդրամն: Գրեաց սմին աղագաւ եւ զղապզ եւ ետ Զաքարիա վարդապետին, զի յառնուլն զդրամն ընդ թամասուկին Մելքոնին տացէ:

Թուղթ եւս առ Մելքոն Աղայն, վասն վերոյիշեալ փօլիցայիցս եւ որպիսութեանց երկրիս: Եւ զի ճօթեղէնք եւս էին այժմ հարկաւորք, զփուսուլայ գրեաց, յատկացուցանելով զանուանս եւ զորքանութիւնս նոցին, զի ընդ Զաքարիա վարդապետին յղեսցէ: Եւ զի ՚ի փոլիցայէ Զմիւռնոյ նուիրակ Ղուկաս վարդապետին որ յառաջ քան զայս, մասն ինչ մնացեալ էր առ նմա (որպէս ասացեալ է ՚ի Նոյեմ. Գ)., գրեաց` զի տացէ Զաքարիա վարդապետին եւ զբարեւագիրս այս ասաց լինիլ այնմ ՚ի ղապզ: Եւ զի` զՊօլսոյ գրեանսն փութով յղեսցէ:

Թուղթ եւս առ Տիրացու Խաչատուրն ՚ի Պօլիս վասն այսց փօլիցայիցս եւ վասն թղթոց եւ այլ եւս բանից: Նաեւ Թօխաթու նուիրակ Եսայի վարդապետն եւս էր յղեալ ՚ի Կարին զդրամ ինչ ՚ի ձեռն Թիֆլիզեցի Խօջայ Մկրտումին եւ զսանատն յղեալ էր ՚ի Կարին ՚ի ձեռն նսնուսեցի մհ. Յօհաննիսին: Վասնորոյ` գրեաց սրբազան Վեհըն այսր աղագաւ` զղապզ եւ ետ Զաքարիա վարդապետին, զի անդ առեալ ՚ի Մկրտումէն զդրամն տացէ ինքեան հանդերձ թամասուկովն որ առ մհ. Յօհաննէսն:

Թուղթ եւս առ նսնուսեցի մհ. Յովաննէս Աղայն գրեաց վասն այսր եւ այլոց բանից եւս: Եւ զի ըստ գրելոյ սրբազան Վեհին ՚ի Դեկտ. Զ, յղեալ էր Զմիւռնոյ նուիրակ Ղուկաս վարդապետն զհարկաւոր իրս ինչ քսրեղէնս ՚ի ձեռն Մարտիրոսի ումեմն, որ եկեալ էր այժմ ՚ի Կարին, յաղագս որոյ գրեաց սրբազան Վեհըն զղապզ մի եւ ետ Զաքարիա վարդապետին, զի առցէ զայնս ՚ի Մարտիրոսէն եւ տացէ նմա: Եւ զի սրբոյ Աթոռոյս Մութավէլի Բարսեղ վարդապետին որ ՚ի Պօլիս, քսուր ինչ յաւանդ եդեալ գոյր ՚ի Կարին առ Սարգիս Քահանայ ոմն եւ Բարսեղ վարդապետն գրէր սրբազան Վեհին` առնուլ զայն եւ բերել ՚ի սուրբ Աթոռս: Ուստի գրեաց սրբազան Վեհըն առ Քահանայն այն զթուղթ տալ զքսուրսն լրապէս Զաքարիա վարդապետին: Որոց զդաւթարն եւս ետ Զաքարիա վարդապետին նովաւ առնուլ: Այսպէս եւ Իսահակ վարդապետ ոմն Թամզարացի (որ նարդեանս է միաբան սրբոյ վանիցն Խորվիրապայ), տուեալ գոլով զքսուրս ինչ յաւանդ մհ. Յօնանին (որ յիշեցեալ կայ ՚ի յԱպրիլի ԻԸ), եկեալ այժմ խնդրեաց ՚ի նմանէ եւ նա ասաց թէ` եդեալ եմ ՚ի Կարին յաւանդ առ Սարգիս էրէցն, որ ՚ի վերոյ յիշեցաւ: Ուստի` գրեաց սրբազան Վեհըն երիցուն զայն եւս տալ Զաքարիա վարդապետին զի բերցէ: Մհ. Յօնանն եւս գրեաց առ Քահանայն վասն այսորիկ զթուղթ եւ դաւթար ընչիցն եւս յղեցաւ:

Եւ զի ՚ի յայսմ միջոցի եկին ՚ի Պօլսոյ թուղթք, գրեալ էր Բարսեղ վարդապետն զհասանիլն կանոնականին, զոր ՚ի Մայիսի Դ գրեաց սրբազան Վեհըն առնել Կիւրակէ զտօնս սրբոյ Լուսաւորչին եւ սրբոց Առաքելոցն Թադէոսի եւ Բարդուղիմէոսի: Ընդ որ ամենեքեան ուրախացեալք հաստատեալ էին: Գրեալ էր եւ զդադարիլն շարժին, որ յիշեցեալ է ՚ի Յուլիսի Գ եւ զշինումն աւերելոցն եւ զայլ բանս: Ուստի` եւ սրբազան Վեհըն ՚ի պատասխանի նորին թղթոյ գրեաց առ նա զթուղթ վասն տեղւոյն` զոր վասն իւր կամէր շինել, զի որպէս եւ կամիցի, ըստ ձեռնտուութեանն հոգասցէ: Եւ վասն իթլախի Աբրահամ վարդապետին բազում հարկ, զի հարկեալ զՊատրիարգն եւ զիշխանսն վաղվաղակի հանել տացէ (որպէս եւ ՚ի Յուլիսի Գ. գրեցաւ), եւ վասն յղելոյն զԶաքարիա վարդապետն ՚ի Կարին վասն փօլիցայից: Եւ վասն մատանւոյ ինչ իւրոյ, զոր չրաղ եղբօրն իւրոյ Խօջայ Կարապետն վատնեալ էր, զորոյ որպիսութենէն հարցեալ էր նա: Միամտութիւն վասն թամասուկին, որ ըստ նորին խնդրոյ ՚ի յՕգոստոսի Գ յղեցաւ ՚ի Հաշտարխան: Նաեւ վասն ընչիցն իւրոց` որ ՚ի վերոյ յիշեցաւ: Եւ զի` զխոստմունս արարեալ էր նա տալ յանուն Պարսպաշինութեան սրբոյ Աթոռոյս, խոստացաւ սրբազան Վեհըն գրել զյիշատակն ՚ի յարձանի: Եւ զի փութով գրեսցէ զպատասխանի փոքրիկ թղթոյն փութանակի, որ գրեցաւ առ նա ՚ի Յուլիսի ԻԸ: Եւ զի միւսանգամ եւս եկին ՚ի Պօլսոյ թուղթք, խոստացաւ զպատասխանիսն յետոյ գրել:

Առ Պօլսոյ Պատրիարգ Գրիգոր վարդապետն, դարձեալ ըստ գրոյ Բարսեղ վարդապետին եւ խնդիր վասն տեղւոյ նորին: Եւ բազմիցս հարկ` եւ սիրով մեղադրութիւն եւ սաստ վասն իթլախի Աբրահամ վարդապետին, որոյ աղագաւ քանիցս գրեաց եւ նա զանց առնէր: Այնքան, մինչ զի` թէ ոչ վաղվաղակի ասէ հանեալ յղիցես, ոչ եւս այնուհետեւ յարամնայ ՚ի միջի մերում սէրն` որ մինչեւ ցայժմ:

Առ Յարութիւն Ամիրայն ՚ի Պօլիս, օրհնութիւն եւ շնորհակալութիւն նորածին մանկանն:

Առ Չարքեազ Յօհանն ՚ի Կարին, սէր եւ օրհնութիւն:

Առ Կարնոյ նուիրակ Սարգիս վարդապետն, վասն այսց բանիցս եւ իւրոյ գործոյն: Եւ զամենայն վերոյասացեալսն, զփօլիցայսն եւ զայլ հոգալիսն, էարկ սրբազան Վեհըն ՚ի դաւթար եւ ետ Զաքարիա վարդապետին ՚ի խրատ` եւ ՚ի յիշատակ մտացն, պատուիրեալ եւս նմա ՚ի բերան զբազում պատուէրս: Օրինակ թղթոյ Պատրիարգին տեսցի ՚ի բոլորագրահամար տետրն յերեսն ՄԽԲ:

Որովհետեւ Իւչքիլիսայի Առաջնորդ Զաքարիա վարդապետն ՚ի բազում ժամանակս մնալով մնաց աստ (որ յիշեցեալ է ՚ի Յուլիսի Ի եւ յայլ տեղիս), եւ սրբազան Վեհըն զԲայազտոյ նուիրակ Մինաս վարդապետն դարձուցեալ էր ՚ի սուրբ Աթոռս վասն նեղութեանց երկրին, որ զԲայազիտ Քաղաքն իւրով շրջակայ գիւղօրէիւքն միայն էր աւարտեալ (որպէս ասացեալ է ՚ի Յուլիսի Գ. որեւ յղեցաւ դարձեալ ՚ի Բայազիտ ընդ սրբոյ Ամենափրկչին, ՚ի յՕգոստ. Զ): Յաղագս որոյ կամելով սրբազան Վեհին իբրու շահել զԶաքարիա վարդապետն, ետ նմա զմնացեալ նուիրակութիւն երկրին Բայազտոյ: Վասնորոյ` փոխեալ զանուն կոնդակի Մինաս վարդապետին, ետ նմա: Եւ զսիրոյ թուղթ մի գրեալ առ Բայազտոյ փաշայն, զթուղթ մի եւս առ Մարգարէ Աղայն գրեաց եւ ետ նմա: Եւ ելին երկոքին Զաքարիա վարդապետքն ՚ի սուրբ Աթոռոյս, ՚ի յՕգոստոսի ամսոյ Ժ:

Յետ ելման երկոցունց Զաքարիա վարդապետացն ՚ի սրբոյ Աթոռոյս, ժամանէր առ սրբազան Վեհըն թուղթ ՚ի նոյն իսկ աւուրն, ՚ի Հնդկաց նուիրակ Յովհաննէս վարդապետէն եւ թուղթ ՚ի Հնդկաց նուիրակէն: Որ գրէր թէ` քան զայս յառաջ գրեալ եմ զամենայն որպիսութիւնս իմ եւ յղեալ փայեկաւ, այլ փայակն այն, տակաւին ՚ի սուրբ Աթոռս չէր հասեալ: Իսկ այժմ` եկեալ գոլով նմին ՚ի Բաղդատ, գրեալ էր թէ մինչեւ ցտօն սրբոյ Խաչվերացին, աստ եմ եւ յետոյ ճանապարհորդիմ յայդկոյս: Որեւ յղեալ էր այժմ զԳ իշոյ հակն ինչս քսրեղէնս, յառաջ քան զինքն ՚ի Բայազիտ: Իսկ ըստ որում գրեալ էր առ նա սրբազան Վեհըն զպատուէր` յղել փօլիցայիւ ՚ի Թօխաթ կամ ՚ի Կարին զդրամ, զի ինքն ՚ի սուրբ Աթոռս բերել տացէ (որպէս ասացեալ է ՚ի Հոկտ. ԻԹ) տուեալ էր ՚ի Բասրա զդրամ` Շօռօթեցի Մկրտիչ Աղայի օրթաղին, զի սրբազան Վեհըն ՚ի Թօխաթ ՚ի Մկրտիչ Աղայէն առցէ եւ զայս այժմ գրեալ էր սրբազան Վեհին: Դարձեալ եւ ՚ի Պօլսոյ եւ ՚ի Կարնոյ եւս ժամանեցին առ սրբազան Վեհըս մեր թուղթք, ՚ի յորս էր եւ թուղթ ՚ի մհ. Մօվսիսէն որ ՚ի Պօլիս: Որ ՚ի դրամոյ Զմիւռնոյ նուիրակ Ղուկաս վարդապետին (որ յիշեցաւ ՚ի յՕգոստ. Ժ ՚ի յսկզբան բանին), ՚ի չորիցն զմինն, տուեալ էր Ագուլեցի Պ. Մէյրամ ղուլուն եւ ՚ի նմանէ զթամասուկ առեալ յղեալ էր առ սրբազան Վեհըն այժմ, որպէս զի` առցէ սրբազան Վեհըն զդրամն զայն ՚ի Կարին ՚ի գեանճեցի Մանուչարի որդի մհ. Խաչատուրէն (որ եղեալ էր երբեմն չրաղ Ագուլեցի Աղային), գրեալ էր եւ Մէյրամ ղուլին զբարեւագիր առ ընկերն իւր մհ. Խաչատուրն, տալ զդրամն զայն սրբազան Վեհին. որեւս զԲ բարեւագիրս եւս ընդ թամասուկին այժմ էհաս սրբազան Վեհին: Բայց որովհետեւ` գրեաց սրբազան Վեհըն ընդ Զաքարիա վարդապետին զփօլիցայագիրս վասն բովանդակ դրամոց Ղուկաս վարդապետին` որ ՚ի Պօլիս առ մհ. Մօվսէսն էր, երիցն ուրոյն եւ միոյն ուրոյն, զի Զաքարիա վարդապետն առցէ ՚ի Կարին զերեքն ՚ի Մելքոն Աղայէն եւ զմինն ՚ի Սարխօշէն (որպէս ասացաւ ՚ի վերոյ ՚ի յՕգոստ. Ժ) եւ այսու միովս` զոր ՚ի մհ. Խաչատուրէն առնլոց էր սրբազան Վեհըն լինէր հինգ, բայց Ղուկաս վարդապետինն չէր Ե, այլ Դ: Վասնորոյ գրեաց սրբազան Վեհըն զթուղթ մի ՚ի Պօլիս առ մհ. Մօվսէսն ՚ի պատասխանի թղթոյն, ծանուցանելով նմա զյառաջագոյն փօլիցայ առնելն զբովանդակ դրամն Ղուկաս վարդապետին ՚ի վերայ իւր Սարխօշիւն եւ Մելքոնիւն եւ զյղելն զԶաքարիա վարդապետն ՚ի Կարին վասն նոցին ՚ի յառնուլ: Եւ գրելով զայս թէ` զփօլիցայագիրն` որ ՚ի ձեռն Սարխօշին, մի դարձուցանիցես յետս, հաշուելով զՄէյրամ Ղուլուն տուեալդ ՚ի տեղի նորին, այլ զայլ դրամս ճարեալ` զՍարխօշի փօլիցայն եւս տո'ւր: Զի գոն առ քեզ եւ այլ դրամք բաց ՚ի դրամոյ Ղուկաս վարդապետին, այսինքն, Ատրանեցի մահտեսի Զաքարիայի դրամն եւ Պարոն Յովսէփինն եւ այլք սոյնպիսիք (զորոց ասացեալ է ՚ի Մայիսի Դ եւ ՚ի Յուլիսի ԺԹ): Եւ թէպէտ ասէ գրեալ է ՚ի փօլիցայագրումն Սարխօշին, թէ յարդեանց Ղուկաս վարդապետին, այլ այն ՚ի մէջ մեր եւ սիրելւոյդ մերոյ հոգ ո'չ է: Վասն որոյ` եւ առ Զաքարիա վարդապետն գրեաց սրբազան Վեհըն զթուղթ եւ զՄէյրամ Ղուլու թամասուկն եւ զբարեւագիրն որ առ մհ. Խաչատուրն եդեալ ՚ի թղթոջն յղեաց` պատուիրանաւ, զի առցէ զդրամն զայն ՚ի մհ. Խաչատուրէն եւ տացէ նմա զթամասուկն եւ զբարեւագիրն: Նոյնպէս եւ զՍարխօշինն առցէ, առանց տարակուսանաց եւ կասկածելոյ իրիք եւ մի մտայոյզ լիցի ինքն եւ կամ ՚ի նոցունց պատրիցի, զի մինն ՚ի դոցանէ ա'յլ դրամէ ասէ եւ ոչ յարդեանց Ղուկաս վարդապետին: Գրեաց նաեւ զորպիսութիւն Հնդկաց նուիրակ Յովաննէս վարդապետին եւ զգրեալն ՚ի նմանէ (որպէս ՚ի վերոյ գրեցաւ) պատուիրելով` զի ՚ի հասանիլն ՚ի Կարին, գրեսցէ փութապէս առ Մկրտիչ Աղայն եւ հարցցէ` թէ գրեալ իցեն առ ինքն զթուղթ Յովաննէս վարդապետն մեր եւ կամ իւր օրթաղն որ ՚ի Բասրա առեալ է զդրամն: Եւ թէ նա գրեսցէ թէ հասեալ է, յայնժամ եւ ինքն ըստ իւրոյ պատուիրին զոր ՚ի գնալն ետ, հետեւեալ գտցէ ՚ի Կարին զդրամ տուօղ` թէ այս դրամոյս աղագաւ, եւ թէ այնմ որ յարդեանց Եւդոկիոյ նուիրակ Եսայի վարդապետին գոյր առ Մկրտիչ Աղայն: Եւ ՚ի գտանիլն գրեսցէ, զի ինքն զփօլիցայագրեանս յղեսցէ աստի, զի զդրամսն առցէ նոքօք: Օրինակ սոցին ՚ի բոլորագրահամար տետրոջն է յերեսն, ՄԽԳ: Որք յղեցան զկնի նորին Օգոստ. ԺԴ:

Ապա ելեալ սրբազան Վեհին ՚ի կողմանս Աշտարակու, Մօղնու, Յօհանավանից, Լազրվանից եւ ՚ի Յագարակ ՚ի ԺԲ աւուր Օգոստոսի ամսոյս, զաւուրս Ժ, զբօսանաց աղագաւ: Եւ դարձաւ յետս ՚ի սուրբ Աթոռս ՚ի յՕգոստ. ԻԴ: Պտտուեցեալ յոյժ ՚ի մեծամեծաց տաճկացն որք յայն կողմունսն գոյին, որպէս եւ յառաջ քան զայս եւս, որ ասացեալ է ՚ի Յունիսի Ը: Եւ մինչդեռ էաք անդէն ՚ի յԱշտարակ, ժամանեաց առ սրբազան Վեհըս մեր թուղթ ՚ի Կարսայ Առաջնորդ Պետրոս վարդապետէն, զոր ո'չ թէ ինքն միայն, այլ ընդ Եաղուբ Աղային ՚ի միասին, որք միաբան խնդրէին վասն չորից ոմանց բանադրել զնոսա, մեծաւ աղերսանօք. խնդրեալ էր եւ զբրինձ վասն նորա եւ այլ տաճկաց եւ զայլ խնդիրս եւս գրեալ: Առ այս սրբազան Վեհին նեղացեալ, որ տաճկին գրեցուցանէր բանադրել զորս ինքն կամէր եւ ոչ զմի ինչ յանցանս ցուցանելով զնոցանէ: Գրեաց առ նա զթուղթ մի, մեղադիր լինելով նմա այնր աղագաւ: Գրեաց եւս, զի յղեսցէ անտի վասն բրնձին զտանօղս եւ զորքանն եւս գրեսցէ, զի յղեսցէ: Առաքեցաւ առ նա ՚ի Օգոստ. ԺԷ.