Գիրք վաստակոց

Տաք եւ չոր, եւ տաք եւ գէջ օդն յոյժ օգտակար է, որպէս Կիլիկեցւոցն եւ Լիպիացւոցն օդքն՝ գովելի եւ օգտակար են եղենեացն: Զի հանապազ յամարանոջն՝ պարխրցին եւ հարաւայինն հանդերձ արեւելեան հողմովն փչեն եւ զարգացուցանեն զամենեսեան. եւ այսպէս առաւել պտղաբերի եւ արդիւնանայ: Եւ բարձրագոյն կողերն եւ մատներն եւ տափերն՝ եւս առաւել լաւ են. զի օդն անդ լաւ բանի. եւ այս տեղեաց եղն առաւել ազնիւ լինի եւ պարարտ. եւ դաշտային եւ ցած տեղեացն հակառակ են սոցա. եւ ձէթն թանձր եւ մրրոտ լինի եւ վատթար: Եւ այսու ստուգեալ եմք որ լաւագոյն օդքն ապրեցուցիչ են տնկոցն. եւ որպէս հաստ օդքն վատթար են տնկոցն, նոյնպէս եւ նօսրագոյն եւ միջասահմանն՝ օգտակար է եւ լաւ յամենայն կողմանց: Եւ վասն այնորիկ արձակ պարտ է տնկել զծառսն, որ օդն բանի 'ի միջոցն եւ գոյացուցանէ զպտուղն: