Գիրք վաստակոց

Արժան է զհացն յայնպիսի աման պահել, որ արեւելից լոյսն եւ պարխրային հողմն 'ի ներք մտանէ, եւ ունենայ շնչահան, որ ամէն ծուխն ելանէ: Եւ մօտ 'ի հորոնն՝ ախոռ, արտաքնոց եւ այլ ինչ գիշահոտ տուն մի՛ թողուր. եւ ա՛ռ սպիտակ հող եւ շաղախ արա, եւ մազ խառնեա 'ի ներք, եւ յարդի ծեղ, եւ լաւ կոխեա եւ նեխեցո քանի մի օր, եւ այնու ծեփեա 'ի ներքսէ. թէ քարուկիր առնես եւ թէ այլ ցեղ շէնք՝ դու զներսն եւ զդուրսն ծեփէ եւ թող որ չորանայ եւ սնանի աղէկ. եւ ապա ժողովել տուր զվայրի լեղի խիարկի տակն՝ որ յաւերակսն լինի՝ իւր ցօղունովն, եւ դիր 'ի ջուր եւ թրջեա երեք օր, եւ առ անցո 'ի վերայ. եւ ա՛ռ աւազ մանր եւ կրակաց մոխիր. եւ այն ջրովն շաղախեա նօսր եւ օծեա զմէջգետինն եւ զորմունքն՝ աղէկ, եւ լից զցորեանն: Եւ են ոմանք, որ զաւազն եւ զկրակաց մոխիրն՝ գրաստուց գոզով թրջեն. եւ այս աղէկ է, զի սպանանէ զոջիլն եւ զայլ կերիչսն: Եւ ոմանք 'ի յաւազի տեղ՝ զկղմինտրն լեսեն եւ դնեն, եւ այս լաւ է. եւ այլք առնուն զհօտին մոխիրն կամ զկաղնի փայտին, կամ զգշկուրն. աղա զորն եւ կամիս յայս երիցս. եւ երբ լնուս զամանն 'ի վերայ ցորենին՝ ցանեա աղէկ քանի կարես. խիստ պահէ զցորեանն: Եւ ոմանք զգառնադմակիկ խոտն չորացուցանեն եւ լեսեն եւ 'ի վերաց ցանեն. եւ այլք զպտղի ձիթի տուրտինն առնուն եւ զաւազն եւ զկրակաց մոխիրն, եւ յիրեար խառնեն եւ օծանեն. զհատն շէն եւ գէր պահէ: Եւ այլ ոմանք եփեն զտուրտինն որ կէսն մնայ, եւ սոսկ այնու օծեն: Եւ այլ՝ առնուն զմաղած սպիտակ հողն եւ զնռան ծառին տերեւն, եւ չորացուցեալ լեսեն եւ մաղեն, եւ կէս 'ի կէս առնեն զինքն եւ զհողդ, լաւ ցամաք եւ չոր. եւ 'ի հարիւր մոդ հաց՝ մոդ եւ կէս խառնեն եւ միաւորեն աղէկ ընդ ցորեանն, եւ յետոյ 'ի ծեփած հորոնն ամնեն, եւ պահէ զցորեանն: Այլ. ա՛ռ զխոտն որ կոչի արապերէն Խօլօրա, եւ թօշմեցո զնա, եւ տարածեալ մեկնեա 'ի յատակն հորոնին, եւ զցորեանն 'ի վերայ ած. յամէն երեք թիզ՝ կարգ մի խոտ դի՛ր մինչ 'ի վեր. պահէ այս խոտս զհացն շէն՝ իւր հոտովն եւ համովն եւ կշռովն, որ չթեթեւանայ բնաւ: եւ ոմանք զթզենւոյն տերեւն ապրացուին ներքեւ փռեն, 'ի կերչէ պահէ: