Գիրք վաստակոց

Ծովու ջրով կամ աղջրով լուա զշունն աղէկ. եւ ապա ա՛ռ հինայ եւ խարբախի տակ լեսած, եւ չաման 'ի ջուրն թրջած, որ չամանջուր լինի, եւ ազոխջուր. յիրեար խառնեա եւ աղէկ միաւորեա. եւ յետ լուանալոյդ օ՛ծ զշունն. խիստ օգտէ: Եւ թէ պտղի ձիթի տուրտնով օծանես, շատ օգտէ. եւ զլուն եւ զոջիլն սպանանէ. եւ թէ բոր կամ քածպոր կամ երքոյն կենայ, օգտէ: Եւ այն դեղերն ոչխարաց բորոյ գրեցաք. նա, խնկի փոշի՝ ԺԲ դրամ, եւ չարհոտ՝ նոյնչափ, եւ գինեմրուր՝ ԺԸ դրամ, եւ ռաստըխ աղնձած, եւ նադրուն աղ եւ դեղին քիպրիթ, յամէն մէկէ վեց դրամ. եւ խառնեա ափ մի սպիտակ կասլայի պտուղ հարիւր հատ չոր թուզ՝ նուկի եւ կէս, եւ ճփնւոյն տերեւ երկու երեք, եւ անապակ կիր ափ մի. զծեծելոյդ՝ ծեծեա, եւ զայլսն միաւորեա, եւ հա՛ր աղէկ որ զերդ մէրհէմ լինի. եւ 'ի վերայ քթեթի ա՛ծ տարածեալ, եւ 'ի վերայ դի՛ր եւ կապեա. օգտէ եւ կակղացուցանէ զջեղն:

… ապրի այնից, այլ շանբորոյ օգտեն: —

Այլ դեղ բորոյ փորձիւ օգտակար. ա՛ռ ծծումբ հարիւր տրամ, սնտիկ՝ տասն տրամ, սոնիճ լեսած՝ ափկից մի, ցմախտակ լեսած, եւ ձիւթ չորս նուկի, խայծղան երեք նուկի, խոզիտ՝ տասն նուկի. աղա զամէնս, եւ զսնտիկս կտրատեա խոզտովն. եւ զամէն դեղերդ 'ի խոզտին լի՛ց եւ եռացո, եւ զձիւթն եւ զխայծղանն հետ իրերաց հալեա, եւ 'ի վերայ խոզտուին եւ այլ դեղերոյդ ա՛ծ եւ խառնեա, որ միաւորին եւ եռան հետ իրերաց. եւ երբ յետ առնուս, նուկի մի քացախ բարկ 'ի ներք խառնեա, եւ օ՛ծ յարեւն, եւ յետ երեք աւուրն լուա սապունով եւ երեք հետ օ՛ծ. այլ բնաւ բոր չմնայ. փորձով: Եւ թէ կտաւ հատի խայծղան հանես եւ օծանես, օգտէ: Եւ թէ առնուս զճնին եւ եփես, եւ ջրովն զշունն լուանաս հինգ վեց հետ, եւ ապա յետոյ խոզտուով օծանես, օգտէ: