Գիրք վաստակոց

'Ի վերայ երկու հարիւր լիտր գինւոյն՝ վեց թուխթ մորէ լից, եւ տասն ընկոյզ անարատ, եւ սպրկիկ չորացուցած խոտ դիր. օգտէ: Եւ թէ առնուս գետոյ խճեր եւ թրջես, կակուղ ձիւթով 'ի ներք ձգես՝ օգտէ:

Այլ դեղ. ա՛ռ չոր եղրդի փայտ, ջանջախեա եւ 'ի գինին ձգեա, եւ ծեփեա. լաւացուցանէ. եւ յետ հինգ աւուր 'ի բան տար. սակայն 'ի բաց մի՛ թողուր, երբ առնուս՝ շոյտ կալ եւ ծեփեա զկարասին բերանն:

Եթէ բորբոսահամ եւ աղէհամ լինի գինին, ա՛ռ փոխեա զամանն որ նոր լինի ձիւթած, եւ չոր պրտու դիր 'ի ներք. եւ հալեա ձիւթ եւ 'ի ներք լից: Եւ այլ ոմանք առնուն չոր պրտու եւ խառնեն 'ի վեց լիտր կակուղ սեւ ձիւթ, եւ եռացուցանեն. եւ 'ի հարիւր լտեր կարաս ձգեն, նա լաւացուցանէ: Եւ այլ. ա՛ռ հին պանիր կծու վեց դրամակշիռ, եւ ձգեա 'ի վերայ հարիւր լիտր գինւոյ՝ լիտր մի, նա օգտէ: Բայց երբ ածես՝ աղէկ խառնեա եւ 'ի մրրէն պարզեա, եւ յայլ աման ա՛ծ: