Գիրք վաստակոց

Ա՛ռ զթրմուզին ծաղկած արմատն, եւ 'ի վերայ սիզին ցանէ, եւ ԺԲ օր 'ի տեղն թո՛ղ. նա չորացուցանէ զամէնն, եւ յետոյ աղբ ցանեա 'ի վերայ գետնին:

Պօլոս եւ Տիմոխար ասացեալ են, թէ ա՛ռ զթրմզին ծաղիկն եւ զաղշպէնկին ջուրն՝ ծեծեա եւ քամեա. 'ի թուրջ դիր օր մի եւ գիշեր մի, եւ յետոյ զայն ջուրն 'ի վերայ սիզին ցանեա, նա չորանայ: Եւ որ կամի սպառել զսէզն, նա 'ի թէմուզ ամսոջ երբ արեւն 'ի Խեցգետինն մտանէ եւ լուսինն յԱյծեղջիւրն, դու վաստակեա 'ի վերայ սիզին եւ փորեա, եւ տակովին հանել տուր եւ 'ի դուրս ձգեա, այլ բնաւ չլինի: Եւ երբ սէզն փտի՝ լաւ աղբեա. եւ թէ ուզես որ բնաւին չորանայ, տուր շինել պղնձի փորիչ, եւ շող 'ի քօշի արիւն մխեա, եւ այնու փորեա զկակղացուցած տեղն եւ հա՛ն, ամենեւին չորանայ: Եւ թէ ուզես որ եղէգն, վարճոխն եւ հալֆայն սպառի, տես զժամն յորում ելանէ Շէղր-իւլ-ղէպուր աստղն, եւ առ եղէգնի դանակ կամ այլ իրք նման նմին, որով կտրել կարենաս եւ այնու կտրեա զեղէգն եւ զհալֆայն չորս մատն ներքեւ հողոյն. եւ ապա սեւ ձիւթ եւ գինի ընդ իրեար եռացո, որ կակղանայ, եւ այն ձիւթովն զխոտին կտրուքն օծ, նա այլ չբուսանի, ամէնն չորանայ: Բայց միայն մորենւոյն եւ այլ փշոցն պարտ է զտակն փորել եւ բանալ, եւ ապա զտակքն երկաթի սարուածով կտրեա, եւ հալած ձիւթ կա՛լ, եւ զտեղիսն որ կտրես՝ ձիւթեա, ամէնն չորանայ: Եւ եթէ տակն հաստ լինի եւ չկարես կտրել, ընդ տակռիճքն 'ի վայր լից եռ ընդ եռ, նա չորանայ: Եւ զխոտն որ կոչի յունարէր ֆիսմիալոս՝ յելանելն Շէղր-իւլ-ղէպուր աստղին թէ կամենաս սպառել, վաստակեա եւ հողով ծածկեա, նա անհետ կորնչի: Եւ են ոմանք որ զսա սահմանեն՝ երբ լուսինն յԱյծեղջիւրն լինի եւ լրումն ունենայ, եւ չորանայ: Եւ տես զլուսինն՝ երբ յայն պուրճն լինի, որ չէ ցանելոյ եւ սերմանելոյ պուրճ՝ ա՛ռ զթրմուզն եւ 'ի հալֆայուտ տեղին ցանեա, նա զամէնն սպառէ: Եւ ոմանք զթրմզին ցօղունն ցանեն 'ի վերայ վարճոխուտ եւ հալֆայուտ տեղւոյն, նա չորացուցանէ զամէնն. եւ այլք զթրմուզն ալիւր առնեն եւ բողկի ջրով թրջեն, եւ երբ կտրեն զտակն՝ զայն ջուրն 'ի վերայ ցանեն, նա այլ չբուսանի: