Գիրք վաստակոց

Են ոմանք որ ձողեր թափիչք առնեն եւ թափեն. եւ այն վնաս է, աւերէ զծառսն, եւ զձէթն. զի հողոտի պտուղն եւ աւերէ զձէթն: Պարտ է երեքուռնի բարձր սանդուղք շինել, եւ տոպրակ կախեն քաղողքն 'ի վզերն. եւ զծայրից ճիւղսն պատրաստ իջուցանեն եւ քաղեն, եւ տոպրակովն 'ի վայր բերեն. եւ քան զամէն լաւն եւ գովածն՝ սանդղովս է: Բայց թէ 'ի հարկէ թափես թափչով, 'ի ներքեւն իրք փռեա, որ պտուղն 'ի գետին չանկանի. բայց այնպէս ա՛ծ զվարոցն, որ զճիւղսն չկոտորէ. թէ ոչ՝ ծառն սղալի եւ տարեբեր լինի. եւ ընկուզիքն այս պատճառաւս են տարեբերք: Զձիթին մասարայսն եւ զջաղացանին եւ զամանսն՝ սպրկիկ եւ անուշահոտ պարտ է առնել. եւ հինքն ասացեալ են՝ լուանալ զամէնն շող ջրով եւ ցամաքեցուցանել, եւ եռացուցած գինեմրրով շփել, եւ ապա հով ջրով. եւ թող որ ցամաքի, եւ 'ի բան տար: