Գիրք վաստակոց

Եւ գիտելի է որ թէ ոք 'ի յայգեկթոց ժամն տեսանէ յայգետնկին որթ ուրուք օձ կտապեալ, ստուգապէս այն այգւոյն գինին՝ յայն տարին քացախի: Եւ գինիքն բնութեամբ յԵլաստեղքն, եւ յայգեաց 'ի պտկելն, եւ 'ի վարդին փթթելն՝ զիւրեանց բնութիւն փոփոխեն յայլ եւ այլ համս եւ զայս ժամերս արժան է փորձել եւ համտեսել զգինին 'ի լաւն եւ 'ի վարթարն։ Եւ արդ առաջին փորձելն այսպէէս է որ 'ի կթելն՝ օծանես զձեռքդ նոր մուստառով եւ ընդ իրեար շփես. եւ տես, թէ մեղրի պէս փակչտուկ լինի, գիտացիր որ գինին աղէկ լինի եւ դիմացկոտ, եւ թէ նօսր լինի եւ ջրի պէս, նա շոյտ աւերի: Եւ գիտելի է զի մուստառ որ փոթոթահամ լինի՝ նորա գինին անոյշ լինի. եւ որ քաղցրահամ միայն լինի՝ շատ չդիմանայ: Եւ տես զայն զուֆր՝ որ է զերդւածն՝ 'ի վերայ գինւոյն երեսացն կենայ. թէ դեղնագոյն լինի կամ սեւ՝ այնպիսին չլինի դիմացկոտ. եւ թէ սպիտակ կամ կարմրագոյն լինի՝ գիտացիր որ լաւ է եւ դիմացկոտ. եւ թէ զերդ սարդի ոստայն տեսանես 'ի վերայ՝ ճշմարիտ քացախի շուտով: Եւ այլ. տես ափովդ, թէ կարասն տաք լինի եւ բերանն գէջ, գիտացիր որ շոյտ աւերի. եւ թէ ամանն հով լինի եւ բերանն ցամաք՝ գիտացիր որ դիմացկոտ լինի եւ անուշահամ: Եւ թէ գարունն է նոյն նշանաւդ ճանաչես զինքն: Ապա թէ սիրքէնճիւպինի շարապի համով տեսանես, այն 'ի կարասէն է, ճարտար փոխեա յայլ աման: Եւ են ոմանք որք զձեռս իւրեանց լուանան գինեաւ, եւ հոտովն եւ փակչըտելովն ճանաչեն զգինւոյն որպիսութիւնն: Եւ այլք երկայն սիֆուն շինեն եւ մինչեւ 'ի վայր 'ի յատակն 'ի մրուրն մխեն, եւ յատակէն առնուն զղորդ համն, եւ ճանաչեն զլաւն եւ զվատթարն: Եւ այլք առնուն նեղբերան փարչ մի եւ լնուն 'ի գինւոյն, եւ խծկեն աղէկ, եւ մխեն 'ի հով ջուրն մինչեւ 'ի բերանն, եւ թողուն երեք օր, եւ ապա համտեսեն եւ անտից իմանան: Եւ այլք զգինին աւազով պարզեն 'ի պարզուտն, եւ տեսանեն, թէ վատ լինի՝ մենակ փոխի: