Գիրք վաստակոց

Որ թէ լինին՝ դեղն այս է, որ առնուս զթզենւոյն կրակած մոխիրն, եւ մանր 'ի վերայ ցանես, սատակէ զամէնն: Եւ թէ վասն շատութեանն չկարես յաղթել, ա՛ռ պախրէից գոզ, եւ ձիթի տուրտին, եւ եռացո ընդ իրեար եւ հովացո, եւ 'ի վերայ ցանեա. զամէնն սատակէ: Եւ թէ առնու ոք յայլ ածուոց թրթրէ եւ սամիթ, եւ 'ի մէջ պղնձի խարշէ, եւ զջուրն 'ի վերայ ցանէ, ուր հասանի՝ զայլն սատակէ. բայց հովացո եւ ապա ցանեա: Եւ այլք զայս գտին դեղ թրթրին եւ կերչաց բազմութեանն. զի առին կին մի ցաւոտ տեռատեսութեանն ախտին, եւ քրքրեցին զմազն, եւ գօտելարձակ եւ բոկիկ՝ շուրջանակի ածուոցն անցուցին. նոյնպէս եւ 'ի վերայ տեղւոյն եւ բանջարացն երեք օր զհետ իրերաց, կամ 'ի մէկ օրն երեք հետ. նա զամէնն սատակէ, որ մէկ չմնայ: Եւ թէ առնուս զընկուզի ծառի սունկն եւ ծխես, ծուխն ուր հասանի՝ զամէնն սատակէ:

Եւ թէ առնու ոք ցանել, որ չկուտէ հողմն զհունտն, եւ 'ի մեղմ ստէպ ջրեա մինչեւ բուսանի. եւ 'ի գիշերն սակաւ սակաւ աղբեա, նա շոյտ մեծանայ եւ պարարտ լինի: