Սիրոյ գիրքը

Հեղինակ
Rouben Sevak (1885-1915)  

Բաժին
Martyr Authors  Western Armenian And Diaspora Literature  

Թեմա
Fiction  
Overview
ՍԻՐՈՅ ԱՂԲԻՒՐ
       Ահա՜ կու գամ երջանկութեան ակերէն.
Արիւնըս դեռ երազօրէն կը հեւայ,
Ու արցունքներ արտեւանունքս կ’այրեն։
       Աղբի՜ւր, աղբի՜ւր, ինչ հըրճուանքով տենդագին
Երկարեցի թշուառ շրթնե՛րըս ակիդ ,
Ու ի՜նչ սիրով ըմպեցի ջո՛ւրըդ անգին։
       Ոհ , կ’ուզէի մընալ յաւէտ ակիդ քով ,
Նիհար ճակատս կռթնցընել քու քարիդ ,
Թաղուիլ ջուրիդ երջանկութեա՜ն պատանքով։
       Ու կ’ուզէի հալիլ կուրծքիդ մէջ անհետ ,
Լոյծ մարմնոյդ մէջ կաթի՜լ մ’ըլլալ, կէ՜տ մ’ըլլալ ,
Երգե՜լ, հեւա՜լ , քեզի նըման, քեզի հետ։
       Ի՜նչ մոգութիւն կար մարմինիդ մէջ համակ ,
Ի՜նչ կ’ըսէին ալիքներըդ վազելով ,
Ու ի՜նչ հըմայք կար փրփուրիդ մէջ ճերմակ։
       Շրթունքըս դե՜ռ քեզ կը փնտռեն տենդագին.
Ու հրատապ այտերէս վար մեղմօրէն
Դողդըղալով կը սահի ցօ՛ղը կեանքին…։
       Ահա կու գամ երջանկութեան ակերէն…։
       1908