Ժամանակագրութիւն

Եւ կին մի այլ երեկ շտապ թէ` այսչափ գերոյ տէր եմ եւ ի մեծ բռնաւոր տաճկի մի ձեռին կան, այսչափ դրամ գին եդիր եւ ժամանակ պայմանի եհատ` թէ որ չժամանեցնես, նա' զամենքն ի հաւատոցն կու հանեմ: Ի մեծ պահոցն աղուհացիցն էր, օսմանի որ կայր` նորա առատ ժամանակին էր, ելայ ի ժամն յորդորեցի, երկու հազար ստակի օսմանի անկաւ, առաւ գնաց: Նա' յիմացաք յետ մէկ քանի աւուր` որ ուրացող է եղեր, ի վերի թաղն մէկ տաճկի տունէն իջեր ջինկանոյ. եւ երեք տաճիկ եւ մէկ ղափուճի անուն ձի ունին` սէիսխանայ, այս ցեղ հնարիւք կնոջ ձեռօքն կու ժողովեն, նստեր են արբշռութիւն կենեն: Իւրեանց միջումն գողութիւն են արեր, աղմուկ եւ կռիւ կառնէին եւ ի դատաստան կու քարշէին զմիմեանսն, եւ այն կինն ընդ նոսա էր: