Նամակներ (1884-1915)

206. ԿԼԱՐԱ ԶՕՀՐԱՊԻՆ

[Վիսպատէն], 5 սեպտ. 1911, երեքշաբթի երեկոյ

Անուշիկ հոգիս,

Այսօր քէսէին բերանը բացի, նորէն խենթ մենթ բաներ գնելու համար. մինչեւ հիմա խանութներուն առջեւէն, կ՚անցնէի կոր ակռաս սեղմելով, պարապ տեղը դրամ չի ծախսիմ ըսելով: Մինչեւ այսօր դիմացայ, այսօր համբերութիւնս հատաւ. քանի մը հատ (1 ա. ֆր. ) նուէր ծախու առի, որ colis posteով [1] պիտի գայ, մօտ 20 ոսկիի բան: Բայց շատ պիտի հաւնիս, մանաւանդ խահուէի ֆինճաներ, որ քէյֆ կը բերեն մարդուս: Ուշադրութիւն ըրէք colisները առած ատենիդ որ կոտրած մոտրած բան մը չըլլայ, որովհետեւ garanti [2] են. բօսթային մէջ կամ կէօմրիւկին մէջ բացէք, եթէ կոտրած կան նէ, procès-verbal [3] մը շինել տուէք:

Մէկ հատին factureը [4] կը խրկեմ կոր. միւսն ալ վաղը կ՚առնէք: Ես սեպտ. 12 կամ 13ին ասկէ կը մեկնիմ կոր. Արաքսին եւ Հերմինն ալ 10ին Բարիզէն կը մեկնին կոր, 14ին Լոնտրա իրար պիտի գտնանք:

Առողջութիւնս ինչ էր նէ` ան է: Տաք ջուր խմելով, քալելով հոգիս բերանս եկաւ: Ես դեռ օգուտ պիտի տեսնիմ ըսելով կը քշքշուիմ կոր: Ինչ է նէ սա մէկ շաբաթն ալ անցնինք տէ, պատիւովնիս դառնանք:

Շատ շատ պաչիկներ`

Գ. ԶՕՀՐԱՊ