Նամակներ (1884-1915)

203. ԿԼԱՐԱ ԶՕՀՐԱՊԻՆ

[Վիսպատէն], 1 սեպտ. 1911,
ուրբաթ առտու, ժամ 2 ¹ / ₂

Անուշիկ հոգիս,

3 ¹ / ₂ ժամէ ի վեր ելած եմ. պտոյտ, ջուր, նորէն ջուր. հիլէ սա Քարլսպատի աղով խառնուած տաք ջուրը չի՞ կայ մի, անիկա ամեն առտու ճշմարիտ չարչարանք մըն է: Աս ալ ըսեմ որ փորիս թուլնալուն մասին ալ ասոր մէկ մէկ օգուտը չի տեսայ: Երէկ գիշեր ինքզինքս աղէկ չէի զգայ կոր. մտածեցի որ քիչ մը morale-ս ալ աւրուեր է: Ելայ նորէն թատրոն գացի, Fidelio անունով Պէթթովէնի մէկ opéra-ն տեսայ. pièce [1] հին ոճով բան մը, բայց musiqueը եւ exécutionը [2] շատ աղուոր. 2 ¹ / ₂ -ին ելայ պանդոկ եկայ: Հոն ալ ամեն իրիկուն concert [3] կայ մինչեւ 10 ¹ / ₂ նստեցայ, յետոյ պառկեցայ: Ահա ասանկ կ՚անցնին կոր օրերս:

Կարծեմ թէ շատ սխալ ըրի հոս գալովս: Ինչ որ է. պաշա կէլէն չէքիլէր [4]: Բայց կը վախնամ կոր որ ձմեռը այս հիւանդութիւնը վրաս շատ նեղութիւն քաշիմ:

Դիտեցի որ փորս քիչ մըն ալ շատ կազ կայ. եւ կաթը եւ իւղուրտը կազ կը շինեն կոր: Ատոնք ալ դադրեցուցի: Չեմ գիտեր ի՞նչ մնաց դադրեցնելիք. քիչ քիչ ապրելս ալ պիտի դադրեցնեմ:

Յառաջիկայ երկուշաբթի հոս traitement-ս [5] 15 օր կ՚ըլլայ. անկէ միայն անդին շաբաթ մը եւս պիտի մնամ. ըսել է որ յառաջիկայ երկուշաբթի չէ, միւս երկուշաբթի կամ երեքշաբթի ասկէ պիտի մեկնիմ` օգուտ տեսած ըլլամ կամ չ՚ըլլամ. հաւանականաբար օգուտ տեսած չի պիտի ըլլամ:

Ուստի գալ ուրբաթէն ետքն էլ ինծի Վիսպատէն նամակ մի՛ գրէք. ես ուր որ երթամ adresse-ս հեռագրով լուր կուտամ: Զարմանալի բան որ ես հոսկէ ամեն օր եւ օրը երկու երեք անգամ նամակ եւ carte [6] կը խրկեմ քեզի, մինչեւ հիմա երկու նամակ առի:

Սա խենթ շօշօրթը (1 ա. ), ինչ քաք է, շուտով տունէն հեռացուցէք:

Պաչիկներ

Գ. ԶՕՀՐԱՊ