Նամակներ (1884-1915)

210. ԱՐԱՔՍԻ ԳՐՄԸԶԻՆ

Նաումհայմ, 8 սեպտ. 1911, ուրբաթ, ժամը 4 ¹ / ₂

Ամենասիրելի Արաքսիս,

Այսօր ուրախ եմ: Սրտի հիւանդութենէն շատ կը վախնայի կոր. հոս մեծ spécialiste professeur մը կայ: Այստեղ արդէն սրտի հիւանդութեան համար միայն կուգան: Ինքզինքս քննել տուի. սրտի հիւանդութիւն չունիմ եղեր, միայն faiblesse [1]: Եթէ ունեցած ըլլայի` մարդը զիս հոն վար պիտի դնէր: Ուրեմն իրաւցնէ չունիմ եղեր. միայն խիստ régime-végétation, pas d\emotion et pas de vie Politique si possible [2]: Այս վերջին կէտը պիտի նայինք:

Սիրտս ռէօնթկէօնով չափեցին, պատկերը հանեցին եւ ձեռքս տուին. ձախ կողմը քիչ մը լայնցեր է, բայց անկարեւոր եւ հիւանդութիւն ըսուելու չափ չէ: Միւս կողմէ ըսաւ որ goutteիս համար առած պանքօները կը բաւեն եւ մէյ մըն ալ Wisbadenի մէջ ուրիշ բժիշկ մը յանձնարարեց: Վաղը այդ բժիշկին պիտի երթամ եւ եթէ ան ալ հակառակ կարծիք մը չի յայտնէ, երկուշաբթի պիտի մեկնիմ Լոնտոն, ուր երեքշաբթի պիտի հասնիմ: Savoy Hôtelը պիտի իջնամ:

Պաչիկներ`

Գ. ԶՕՀՐԱՊ