Նամակներ (1884-1915)

222. ԿԼԱՐԱ ԶՕՀՐԱՊԻՆ

[Լոնտոն], 16 սեպ. [1911], շաբաթ ցորեկ

Անուշիկ հոգիս,

Երէկ քենէ առած նամակս զիս շատ նեղացուց. ես ալ անոր համեմատ պատասխան մը գրեցի: Ի՛նչ օգուտ որ ձեռքս չէ. քեզի հետ քէն չեմ կրնար պահել, ուստի պաչիկ մը քիթիկին, եւ հաշտուինք:

Ժամ մը առաջ Հերմինիս եւ Արաքսիին օթօով gare [1] տարի. պագտուեցանք եւ ճամբու դրի զիրենք: Հերմինիս Orient Expessի ստակը` 400 ֆռանք վրայէն վճարեցի: Երէկ Արաքսիին համար առած թախըմին համար 50 անգլ. ոսկի տուի: Կարծեմ իր ըրածին փոխարէնը ըրինք, բայց ասով նորէն Հերմինին իրեն տուած նեղութիւնները կը մնայ. շատ շփածութիւն ըրեր է (հասկցածս, վասն զի Արաքսին բան չ՚ըսեր, չի գանգատեր, ընդհակառակը, շատ ուրախ է):

Հիմա ալ Արշակին համար մէկ սալօնի թախըմ մը եւ մէկ մըն ալ պառկելու սենեակի թախըմ մը առի, ամենքը 60 անգլիական ոսկիի մօտ: Կարծեմ թէ պիտի հաւնի. շատ սիրուն բաներ զատեցի:

Պաչիկներ`

Գ. ԶՕՀՐԱՊ

Ահաւասիկ թուղթը. կէօմրիւկը դուն վճարէ:

Գ. Զ.

Պաչիկներ`

Գ. Զ.

Ինծի համար պասթօն մը եւ հովանոց մը առի. ուղղակի Պոլիս պիտի խրկեն. facture [2] ահաւասիկ: Նոյնպէս Արշակին համար առած meubleներուն [3] factureը ահաւասիկ ներփակեալ է:

Գ. Զ.