Հայերէն Յիշատակարաններ

***

ԽՈՐԱՆԱՇԱՏՈՅ ԱՒԵՏԱՐԱՆ

Երեւան 4823

Նուիրող` Վանենի, դուստր Զաջռոյ Խաղբակեանց

Փառք ամենասուրբ Երրորդութեեանն, որ արժանի արար զեղկելի գրիչս տեսանել զվերջին գիծս ամէն, ամէն:

<317a> Ես` Վանենի` աղախին Քրիստոսի, դուստր Ջաջռոյ Խաղբակեանց, ամուսին Կուկին` որդւոյ Սեւադեանց իշխանաժեանցն, միաբանեցի ի Խարանշատոյ Սուրբ Աստուածածնիս, յիշելով զբանն Եսայա մարգարէի: Երանի որ ունիցի զաւակ ի Սիոն, եւ ետու զծախս սուրբ աւետարանիս, ստանալ զսա ինձ զաւակ հոգեւոր յեկեղեցի յիմանալիս` Երուսաղէմ, ի ժամանակս թագաւորութեան դստեր Թամարին` թոռին գէորգեայ, եւ ի տէրութեան Այրարատեան նահանգին եւ Խաչենոյ, մինչ մի կողմանս Զարեքին աթաբակ Իւանէի:

Յայսմ ժամանակի ինքնակալ տանս Ոահա Վարհամ եւ Ասադն եղբայր իւր, ի հայրապետութեան տեառն Յովանիսի, ի ՈՀԳ (1224) թվականիս եւ շինող եւ առաջնորդ վանիցս Վանական վարդապետն հաստատեաց ինձ աւուր մահուանն իմոյ Ա քարասունք, Ը աւր անբիծք, եւ յամէն տարի Ա աւր ժամ` յիշատակ ինձ Յինանցն աւուր տաւնի աւետեաց Աստուածածնին:

Արդ, թէ ոք զայս Աւետարանս զայս եկեղեցւոյ հանէ ի մերոց կամ յաւտարաց, նզովս առցէ, եւ իմ խղճոյս տէր Է: Կատարիչիք հրամանի գրոգս աւրհնեալ եղիցին Աստուծոյ, ամէն:

***

ԱՒԵՏԱՐԱՆ

Ասֆալգ, Ցուցակ Գերմանիայի, էջ 5-6

Գրիչ` Սարգիս

ա

<103> Ո՜վ սուրբ ընթերցող բարի, եւ զԱթանաս եղբայր հոգեւոր եւզՍտեփաննոս վարդապետն մեր, որ զպատ[ու]ական աւրինակս շնորհեաց, եւ զՎահրամ ստացող, եւ զՎարդան եւ զԴաւիթ զընկերակիցք նորին , յիշեա ի սուրբ ա[ղաւ[թս քո:

բ

<168> Արդ աղաչեմ ընթերցող սուրբ Աւետարանիս անմոռաց յիշել զըստացող սորա զՎահրամ կրաւնաւոր, եւ զգրող սորա զՍարգիս, եւ որ զաւրինակն շնորհեաց զվարդապետն մեր զՍտեփանոս, եւ նմա հայցէք ներումն եւ թողութիւն ի Քրիստոսէ Աստուծոյ մերոյ:

գ

<200> …Որ թէ գրեալ էին ՈՀԳ (1224):

դ

<200> Յաւրինակն հայնց էր գրած, թէ այս սքանչելի գթութեան շնորհ ի Քրիստոսէ ի հեբրաեցի Աւետարանէն:

ե

<220> Ի թվին հայոց ՔՃՀԳ (924)

***

ՃԱՌԸՆՏԻՐ

Վենետիկ 200, Սարգիսեան, Ցուցակ, էջ 33-35

Գրիչ` Թադէոս

Վայր` Սուրբ Գրիգորի գերեզման

ա

<511a> Քրիստոս Աստուած ողորմեա ստացողաց գրոցս` հայր Կոստանդեա եւ Թադեւոսի գրչի, եւ որք ի ծաղկելն աւժանդակեցին` Վարդան ի Կապոսոյն վանիցն, եւ Ղազար գրիչ, որորց ամենեցունսոցա ողորմեսցի մարդասէրն Քրիստոս բարեխաւսութեամբ սրբոց Քառասնիցս, նա եւ ամենայն հաւ[ատ]ով միաբանաց Սուրբ Լուսաւորչիս գերեզմանիս: Եւ զյիշողսդ յիշեսցէ Քրիստս Աստուած, եւ աւրհնեսցէ կրկնապատիկ, ամէն: Որ այսմ սուրբ կտակի խնամ տանի, ընկալցի եւ նա ողորմութիւն յամենառատ պարգեւացն Աստուծոյ, ամէն:

բ

<476b Արդ աղաչեմք զամենեսեան, որք լուսաւորիք ի սուրբ կտակէս, զՎարդան քահանայ Կապոսցի, եւ զՂազար գրագիր յիշեսջիք յաղաւթս ձեր ի տաւնի սուրբ քահանայիցս, որ բազում ջանիւ եւ աշխատութեամբ զգիրքս ծաղկերանկ եւ գունակ դեղեւք զարդարեցին, եւ պայծառազգեաց արարեալ փայլեցուցին ի տես աչաց եւ յուրախութիւն սրտից: Արդ, որպէս սոքա զսա պայծառացուցին ծաղկաւ իբրեւ զծաղկաւէտ երկիր Քրիստոս Աստուած բարեխաւսութեամբ սուրբ վկայիցս, զիւրեանց հոգին, եւ զիւրեանց ննջեցելոցն, եւթնկըկին առաւել պայծառացուսցէ յիւր յարքայութիւնն, եւ նմա փառք յաւիտեանս, ամէն:

գ

Այլ եւ հայր Կոստանդին, որ զայս յիշատակարանս գրեաց` գրեսցի եւ ինքն ի գիրն կենաց` հանդերձ ի սմա գրեցելովք, ամէն:

դ

Ընդ նոսին եւ զՅովաննէս տառապեալ յիշեցէք յաղաւթս, ամէն:

ե

<365a> Բարեխաւսութեամբ ամենայն սրբոց, ես սուրբ վկայիս Յուլիանէ, ողորմութիւն շնորհեսցէ Քրիստոս Աստուածատրոյ` հաւր անապատիս, եւ ամենայն ննջեցելոց իւրոց, զի առ մեզ սէր բազում եցոյց եւ խնամածութիւն, հատուսցէ Քրիստոս նմա յառատատուր պարգեւացն:

զ

Ընդ նմին եւ Ղազարա գրչի` բնակչի Սուրբ Գրիգոր անապատի, որ զանուանս սուրբ վկայիս նշանագրեցի ի լուսանցոյց պատմագրիս` առ դիւրագիւտ լինելոյ խնդրողին, Քրիստոս Աստուած գրեսցի զանուն նորա ի գիր կենաց ընդ սուրբ իւր, ամէն:

է

<332b> Ո՜վ ամենագով Սուրբ վկայուհէ, ըստ քումդ խնդրոյ աղաչեա զՔրիստոս ողորմութիւն շնորհել վասն սուրբ չարչարանաց քոց Կոստանտեա` հաւր եւ սպասաւորի Սուրբ Լուսաւորչին գերեզմանի եւ Մեսրոբայ պատուական քահանայի, որի սպասաւորութիւն մեր եւ կոկել նիւթոյս աւգնական է, եւ համբակին Վարդանայ, որ սպասաւորէ կենաց մերոյ հրամանաւ Կոստանդէ։ Ընդ նոսին եւ մեղապարտ գրչի Թադէոսի, եւ հոգւով միաբանելոցն մեր ուր եւ իցեն, մանաւանդ Պետրոսի, եւ ծնողաց մերոց, եւ ամենայն ննջեցելոց, եւ հաւատացելոց Քրիստոսի, եւ ընթերցողոց, եւ լսողոց, ամէն: