Հայերէն Յիշատակարաններ

***

ԱՒԵՏԱՐԱՆ

Երեւան 234

Գրիչ` Կիւր[ակոս]

Վայր` Կիլիկիա

ա

<299b> Փառք արդար եւ սեռնական էութեանն, Հաւր համալրաբար, եւ Որդւոյ որ ետական եւ Հոգւոյն տառի, զի որոց կարիւ եւ կարակնիւ երկասիրեալ զխաղս դարաստանից անձանց սրբազան աւետարանչացն, զբազմաբեղուն հրաշս խորհրդոյ տնաւրինեցելոյ բանին, նա եւ զյուսայիղծ բանս վարդապետութեան բանապետին վերնոյ արեգականն արդարութեան երեւեցելոյ <300a> ազդեցութեամբ Հոգւոյն Սրբոյ, գրեալ թողին հաւատացելոց ի Քրիստոս մատեան աւետական, ունելով զյուսաիղձ բանս կենարարաին մերոյ, ի դարս եւ ի ժամանակս յեկեղեցիս նազելի Նորոյ Սիոնի, ի մխիթարութիւն որդւոց նորոգութեան որդւոց նորա: Որոյ ցանկացող եղեալ այսմ աստուածային տառի, գրեցի զսա վերջացեալս ի բարեաց, մեղաւք զառածեալս, անյիշելի անուն, ի վայելս եւ ի մխիթարութիւն ոգւոյ իմոյ: Արդ, որ ոք վայելէք զսա, յիշեսջիք ի քրիստոս զգրողս եւ զստացողս սորա, եւ ծնաւղսն մեր, եւ առատապարգեւ Տէրն մեզ եւ ձեզ ողորմեսցի ի գալըստեան իւրում, ամէն:

Բայց եղեւ զրաւ գրչութեան սորա ի հայրապետութեան տեառն Կոստանդեա եւ ի թագաւորութեանն Հայոց Հեթմոյ, ի թուիս ՉԷ (1258) եւ Քրիստոսի փառք յաւիտեանս, ամէն:

բ

<91a> Զանմեղ գրիչս Կիւր[ակոս] յիշեսջիք ի Քրիստոս, եւ որք յիշեքդ եւ դուք յիշեալ լիջիք ի Քրիստոսէ: